Tuesday, April 10, 2007

明師奶與牛肉佬

熱列祝賀曾蔭權今日得到中央正式委位為下任香特區行政長官,致上另兩篇葉旭輝大作!

小明的零用錢與明師奶的辛酸史

今天星期天, 爺爺嫲嫲公公婆婆爸爸媽媽大明小明一起飲茶。小明又提起和諧家庭公平問題: 一人一票決定零用錢。

就此各有各說。到明師奶發言。

“各位, 我六十二歲啦。想當年, 我同你地老豆做佐好多重大決定, 例如我地決定係祖先個神位用電蠟燭唔用真火嘅蠟燭 … 呢個決定實在係好大, 搞得唔好可能仲容易火燭!! 當時我其實已經同你地老豆有默契, 如果搞得唔好燒佐間屋, 我地就一齊永遠放棄打麻雀!!”

“麻雀我打佐四十年啦。自二十年前開始贏多輸少, 希望你明白同容忍我有啲傲慢 … 正如街市牛肉佬呃稱呃佐咁多年, 呃你係正常嘅 … 如果佢唔呃, 一定居心叵測!! 小明你記住啦, 呢啲智慧你老師唔識教你架!!”

“我呢世人好少送禮 … 放下身段唔係話咁易。好似上次拜山用剩啲菊花, 我一番好意送比強師奶, 吖, 佢竟然唔領情!! 我第一次送禮比佢佢就唔領情!! 我心裏多難過 … 我都有人性一面架 …”

“係, 我知我幾十年都關門做決定 … 但你不要忘記街市牛肉佬。我其實做人好真。你信我啦!! 我一定做好你阿媽!!”

「牛肉佬給街坊的信」

明師奶於茶樓發表辛酸史,熱爆街坊,感人肺腑,一時洛陽紙貴。唯獨牛肉佬心有不忿,感覺比人借黎過橋。

“我 四十年前入行,後來轉做牛肉,由於當時少人做牛肉,又冇競爭,覺得自已係街巿精英,不自覺就開始自已幫客人決定牛展定牛腩,開始鬧啲客,亦開始呃稱。呃稱 呃佐四十年,呢啲係環境造就,社會嘅錯! 但今日我好唔開心,好唔明白,點解新黎牛肉仔開檔之後,個個為佢打氣,踩我台?? 我知佢讀番書,唔呃稱,但係大家諗諗,我呃稱呃佐幾十年,慣佐,要改,要好大勇氣放下身段,係好艱難、好艱難、好艱難 … 但牛肉仔未呃過稱,佢根本唔使改!! 咁你地話啦,係咪應該支持我多啲呀??”

“仲有,牛肉仔黎佐之後,我生平第一次,第一次學習到原來啲客可以選擇拒絕我 … 上次強師奶膽敢唔要我切佐嗰件牛膀,我都冇鬧佢,仲笑笑口添!! 你地咁都感覺唔到我嘅誠意??”

0 Comments:

Post a Comment

<< Home

-->