Wednesday, January 30, 2013

2013施政報告致謝動議辯論第二個辯論環節(房屋、基建、規劃及發展)發言稿



1.        主席,成份施政報告,政府講得最多就是不停搵地起屋,講左好多數字,點名要用邊幾幅土地,其中還包括政府用地。無錯,政府真係可以搵到好多地起樓,而且可以起樓的地,其實比施政報告所指的還要多。但係房屋土地問題係唔係一句搵地起屋就可以搞掂晒呢?政府有沒有思考過樓價同城市規劃呢兩個重要問題呢?

2.        政府有冇想過市民的負擔能力呢?施政報告出咗之後,樓價不跌反升,產股就節節上升,就係因為政府根本都沒有措施去壓抑樓市。市民負擔唔起高樓價,難道想市民全面跌入公屋網?

3.        政府個思維淨係起樓,有冇諗過屏風樓呢?有冇諗下社區配套問題呢?社區係要整套配套規劃的,無社區設施無地區經濟,居民都唔會住得舒服,只會引起其他社會問題!

4.        主席,施政報告迴避了地權霸權這個真正「重中之重」的問題,只是一味推搪,拖得就拖。其實政府有大把可行方案可以做到同時增加供應和壓抑樓市這種實事,例如:

5.        第一,政府做嘢要有章法,唔係心急到即刻GIC用地都搶黎起公營房屋,呢個唔係深思熟慮的做法。可以用的地還有好多,我們公共專業聯盟在勾地表內找到五幅合適地皮、啟德發展區可以唔起豪宅起公屋、居屋甚至夾屋,仲有新界好多棕土熟地都可以起樓。西鐵有四個鐵路上蓋地盤一樣有位起公營房屋,估計可供應近3萬個公營單位都可以在本任特首任期內供應。如果政府都唔好好運用現有地皮,仲要向其他用途的土地,例如教育用地,其實就係違背自己的政策承諾,亦都打亂香港整體規劃發展。

6.        另外,香港政府還手握391公頃的閒置土地,但係政府一直都不講清楚地在哪裡,政府要做實事,就不能下下要等地產商發落,政府還要公佈閒置土地資料,並且預早宣佈未來幾年的按季賣地量及地盤所在區域資料,令有置業需要的市民能夠準確預期自己屬意區域的住宅落成量和時間表,咁做地產商就冇咁容易操弄訊息,抬高樓價。希望政府唔好再誤導市民,等佢地以為香港真係好缺地,覺得齊齊捱貴樓係理所當然的事。

7.        第二,政府應該恢復「按季定期賣地」,穩定土地供應。以現在社會經濟環境而言,勾地表制度已經完成它的歷史任務。政府亦要藉此建立自動回撥制度,凡是定期賣地冇人問津的地盤,政府就可以交由房委會或房協改建公營房屋,確保住宅落成量不會因為市場變化或地產商聯手杯葛而受影響,藉此保障基層和夾心階層的市民的住屋需求。

8.        主席,我謹此陳詞。

1 Comments:

At 3:59 PM, Anonymous Anonymous said...

This comment has been removed by a blog administrator.

 

Post a Comment

<< Home

-->