Charles Mok 可圈可點

功能組別：講多無謂，投票至係

[Alternative contribution to Vote04 blog]

功能組別：講多無謂，投票至係

阿貴都算係幾分之一嘅IT人吖，所以上星期五去咗個資訊科技界別三個候選人嘅論壇，嗰日有成百人去Poly聽，都算熱鬧㗎啦，喂，有啲功能組別，由頭到尾都冇一百個人啦！

一如所料，小圈子選舉講嘅九成都係行業問題，候選人當中只有一個有政黨背景，反而俾人追問，咁是否一個包袱。嘩！阿貴都要話聲，有冇搞錯！你估而家選商會 會長咩，你班友選立法會議員呀！議員係神聖嘅立法會入面六十個人之一，有權投票同立法嘅嘢，係有關全香港嘅事，點可以選個只顧行業私利而已嘅人入去㗎？

所以，唔怪得知有咁多三點不露，中間分界保持緘默，其實佢哋算好啦，有自知之明，唔識嘅咪唔講，唔問，早退早着算囉，嘿，但係衰在罷住個位，直情浪費資源啦！

提到政黨背景，阿貴又真係唔明，啲人做乜唔鍾意有政黨嘅人，搞得政治而又入個政黨，有乜唔妥？至少拉起票嚟，自已友都多啲啦！所以，獨立人士並非一枝獨秀，而係孤掌難鳴至真，選咗入去至知廢呀！

總之小圈子選舉怪雞啲就冇法㗎啦，今年有成十一個功能組別竟然得一人報名，哦，講掂數咪免麻煩囉，幾有效率！但係有啲界別反而有好多人參選，會計界就有九星連環，所以最後保証八死一生。

你有你話佢哋唔公平，小圈子，但係自有世外高人稱此為均衡參與，無他嘅，保証有佢啲自己友不勞而獲，有得霸住個位凉冷氣嗑眼瞓，咁咪均衡參與囉；實有佢份，仲唔夠哂均衡？

講多無謂，投票至係。如果你有份投功能組別，恭喜你，記住選個會為全港人民，不分界別地區都有承担，咁至係負責任嘅正路，因為，偉大嘅基本法寫明，國家領導人都重申，最終一定全面直選！如果你只有得投地區選票，都恭喜你，因為你嘅一票，表示你冇放棄，遲早會有真正最均衡嘅玩法，即一人一票是也！

posted by Charles Mok @ 4:32 PM